عندي ليكم موضوع جميـــــــــــل جدااا
ان شاء الله هتستفيدوا منه
الموضوع عن اللغة الانجليزية .. و طرق تحسينها ... انا مجرباهم و الحمد لله الانجليزي بتاعي كويس جداا
أولا : سماع الأغاني و قراءة كلماتها في نفس الوقت
الطريقة ديه بتحسن طريقة القراءة و كمان تساعد علي الكلام زي الاجانب بالظبط و كمان بتزود الكلمات اللي تعرفها و كمان بتحسن الجرامر غير انك لو حفظت الاغاني ديه من كتر قراءتها ممكن تساعدك في الامتحانات لو انت طالب ,,, يعني مثلا لو في فعل و مش عارف تجيب معاه حرف جر ايه ؟! ممكن تفتكره من اي اغنية من اللي سمعتهم :)
ثانيا: قراءة كتب انجليزية (بصوت عالي)
شوف اي كتاب تحبه اذا كانت رواية او اي حاجة تانية و لو ماعندكش كتب انجليزية هات من النت ,, و حتي لو في كلمة او جملة مش فاهمها ماتقـفـش , كمل القراءة و هتفهمها من الجمل اللي بعدها.
الطريقة دي برضو بتزود الكلمات اللي تعرفها و بتحسن الجرامر
ثالثا: مشاهدة الأفلام الاجنبية المترجمة
القنوات مالية التليفزيون ,, افتح اي قناة منهم و اتفرج علي الافلام و اقرأ الترجمة مع سماع الحوار .. و لو انت بتتفرج كتير ممكن كمان تسمع الكلام و تحاول تحوله لعربي قبل ما تبص علي الترجمة ,, و بعد التدريب بمدة هتقدر تفهم الافلام من غير الترجمة .
رابعا: مشاهدة الافلام العربية المترجمة بالانجليزية
زي الطريقة اللي فاتت ,, بس حاول تسمه الكلام و تحوله لأنجليزي قبل ما تبص علي الترجمة
خامسا: كتابة يومياتك او قصة بالانجليزي
حاول تكتب يومياتك او تألف قصة بالانجليزي ,, و لو في كلمة عربية مش عارف ازاي تتكتب بالانجليزي حاول تدور علي كلمة تشبهها او ابحث عنها في اي قاموس
سادسا: مراسلة اصدقاء اجانب
دي اجمل طريقة انك تكلم اجانب ع النت بس لازم تاخد بالك قبل ما تضيف حد
الطريقة دي هتساعدك انك تعرف كلمات اكتر و كمان تعرف الطرق اللي بيتكلموا بيها و كمان ممكن تعرف اللغة العامية بتاعتهم
سابعا: تسجيل صوتك
سجل صوتك و انت بتقرأ او بتتكلم انجليزي و بعدين اسمعه و راجع علي غلطاتك و حسّن طريقة قراءتك
ثامنا: اختيار اللغة الانجليزية في موبايلك او في الكمبيوتر
و ممكن تستخدموا نفس الطريقة في الفرنساوي كمان
كل الطرق دي هتخلي الانجليزي بتاعكم كويس باذن الله, و كمان هتخليكم تعشقوا الانجليزي ... و اسألوا مجرب
و ماتنسوووووش تدعولي بقي
؟
